नाशिकहून वाढदिवस समारंभाहून परतताना काळाने घातला घाला
दिंडोरी पोलीस ठाण्याच्या हद्दीत वणी-नाशिक रस्त्यावर कृषी उत्पन्न बाजार समितीसमोर बुधवारी रात्री भीषण अपघात झाला. अल्टो कार व दुचाकीच्या जोरदार धडकेत कार थेट रस्त्यालगतच्या पाण्याच्या नाल्यात पलटी झाली.
या भीषण दुर्घटनेत कारमधील सात जणांचा मृत्यू झाला असून दुचाकीवरील दोघे युवक गंभीर जखमी झाले आहेत.अपघातानंतर आल्टो गाडी नाल्यात उलटल्याने गाडीत अडकलेल्या प्रवाशांना बाहेर पडता आले नाही. त्यांच्या नाका व तोंडात पाणी गेल्याने मृत्यू झाल्याचे प्राथमिक तपासात समोर आले आहे.
कारमधील सर्वजण नाशिक येथे नातेवाईकाच्या मुलाच्या वाढदिवस समारंभासाठी गेले होते. कार्यक्रम आटोपून परतीच्या प्रवासात त्यांना अपघाताचा सामना करावा लागला.जखमी युवकांना तातडीने नाशिक जिल्हा रुग्णालयात उपचारासाठी दाखल करण्यात आले असून त्यांची प्रकृती गंभीर असल्याचे समजते.घटनेची माहिती मिळताच पोलीस निरीक्षक रघुनाथ शेगर यांच्या मार्गदर्शनाखाली पोलीस पथकाने त्वरित घटनास्थळी धाव घेऊन मदतकार्य सुरू केलेया भीषण अपघातामुळे परिसरात शोककळा पसरली असून एकाच कुटुंबातील सात जणांचा मृत्यू झाल्याने ग्रामस्थांमध्ये हळहळ व्यक्त केली जात आहे.
