बुलढाणा जिल्हा – राज्याचे शालेय शिक्षणमंत्री दीपक केसरकर यांच्या कार्यक्षेत्रातच असलेल्या पिंपळगाव निंभोरा (ता. सिंदखेडराजा) येथील जिल्हा परिषद शाळा आज अक्षरशः कोसळण्याच्या उंबरठ्यावर उभी आहे. विद्यार्थ्यांचे भविष्य घडवणार्या या मंदिराच्या इमारतीला दररोज मृत्यूच्या छायेत शिकण्याची वेळ आली असून, प्रशासन मात्र सात वर्षांपासून प्रस्ताव ‘गहाळ’ असल्याचे कारण पुढे करत हात झटकते आहे.
या शाळेची इमारत अत्यंत जीर्ण झाली असून, भिंतींना मोठे भगदाडे पडले आहेत, छताचे प्लास्टर कोसळत आहे आणि पावसात छत गळते. विद्यार्थ्यांसाठी ही इमारत जिवावर बेतणारी ठरत असूनही आजपर्यंत कोणतीही ठोस कारवाई झालेली नाही. २०१७ मध्ये दुरुस्तीचा प्रस्ताव तयार करून पाठवण्यात आला होता, मात्र आज सात वर्षांनंतरही तो प्रस्ताव कुठे गेला, याचा ठावठिकाणा नाही.
शिक्षणमंत्री असलेल्या जिल्ह्यातच जर शाळांची ही अवस्था असेल, तर इतर भागातील परिस्थितीची कल्पना करणे कठीण नाही. शासनाच्या ‘शालेय शिक्षण व गुणवत्ता अभियान’च्या घोषणा प्रत्यक्षात फोल ठरत आहेत.
पालक, शिक्षक आणि ग्रामस्थांनी यासंदर्भात अनेक वेळा पाठपुरावा केला असला तरी त्याकडे दुर्लक्ष होत असल्याची भावना व्यक्त होत आहे. शाळा म्हणजे केवळ शिक्षणाचे केंद्र नव्हे, तर भविष्य घडवण्याचे मंदिर असते. पण जर हेच मंदिर कोसळण्याच्या मार्गावर असेल, तर ती केवळ शिक्षण व्यवस्थेची नव्हे, तर संपूर्ण समाजव्यवस्थेची शोकांतिका ठरेल.
प्रश्न उपस्थित राहतो: विद्यार्थ्यांना जीव धोक्यात घालून शिक्षण घ्यावे लागणार का? आणि शासन झोपेतून कधी जागे होणार?
